who hailed from the province of our National Poet, Francisco Balagtas, Mohammed Eisa De Jesus of Jeddah..

Mutya 

Ako'y hinanapang humabi ng tudling

Ngunit di-makaya sanhi ng dalahin

Ng tulirong isip at maraming sagwil

Kaya't ang panulat ay laging tamilmil.

Sa maraming buwang nagdaaang matulin,

Habol ang paghinga sa madlang hilahil

At ang abang puso'y kalong ng panimdim,

Inaalaala'y kayraming tiisin.

Lumipas man yaong araw n'yaring giliw

Nang siya'y nagdiwang ng dakilang birthday,

Ang tanging nagawa ay ang manalanging

Humaba ang buhay na biyaya'y angkin.

Sa katotohanan, gayundin ang hiling

Sa Poong Maykapal  sa bawat pagdating

Ng bagong umaga ng aking paggising,

Siya ay kabilang sa pananalangin.

Palibhasa'y Mutya't Diwatang Godmother,

Siya't walang ibang nahirang, nahiling

Na siyang mamuno sa tanang mithiin

Nitong namumukod-tanging OFCouncil.

Sa aba ng aking pusong nagdidildil

Na di-makalahok sa mga balakin

At di-makaambag sa mga gugulin

Lubos na nagalak pagkat tagumpay rin.

Sumapit na pala ang Anita's Kitchen

Sa dahop na nayon ni Fredang magiliw,

At sa linggong ito'y makikilala rin

Sa pook ni Bernard ang Kusinang super.

Hindi magaganap ang mga layuning

Magtatag ng gayong dakilang gawain

Tungo sa paglusog at pag-unlad na rin

Kundi  sa Kusinang inspirasyon namin.

Sa tulong ng Diyos, lahat mararating

Sa pagtutulungan sa mga gampanin;

Kayrami pang dapat ihanda at gawin,

Lahat magaganap, lahat haharapin.

Ito ay sa dahilang ikaw ay kapiling,

Ikaw ang nanguna't ikaw ay susundin;

Kahit nangyari mang sa iba bumaling

Ang ilang lumisan, nariyan ka pa rin.

Di-dapat magtaka kung tagumpay mandin

Ang bawat  bagay na iyong nanaisin;

Palibhasa kasi'y banal ang hangarin,

Sadyang maka-Diyos, angkop pagpalain.

Sa pakikitungo'y pantay ang pagtingin,

Mayama't mahirap, iisa ang turing.

Marunong at mangmang,  mabikas, gusgusin,

Pawang magkatulad sa iyong paningin.

Sa mundo'y maraming animo'y bituin

Sa bawat larangan ng madlang gawain6;

Buong kasaysayan  ng mundo'y nagturing

Ng maraming kwentong pawang magagaling.

Subalit ni minsa'y di ako palaring

Makatunghay niyong buhay mo'y kahambing;

Galing sa dalita, buhay mo'y nagningning

Ngunit di-nagbago, hindi nagmagaling.

Sa 'yong paglalakbay, di-nagliliwaliw

Kundi naglilingkod at naghahabilin.

Ang mga nalikom, nababahagi rin

Sa mga hikahos, lakip ang paggiliw.

Ang sadyang kaiba'y ang iyong lutuin

Ay laging kasama sa mga kilusin;

Maging sa harapan, Internet o texting,

Sa bawat usapan, damay ang pagkain.

Kaya't sa Maykapal, ang tangi kong hiling:

Buhay mo'y tumagal na kapiling namin.

 

Mohammed Eisa de Jesus,
Jeddah/Bulacan